Алматы облысының Іле ауданына қарасты №20 мектеп командасы ұлттық мектеп лигасы «Былғары доп» республикалық кезеңінде бірінші орынды иеленді, деп хабарлайды BOOKIE.KZ ҚФФ ресми сайтына сілтеме жасап.
Шешуші матчтар Қазақстан футбол федерациясының «Футбол үйінде» өтті. Финалда Іле ауданының командасы Қызылорда облысы Қазалы ауданының №25 орта мектебі командасын 1:0 есебімен жеңді.
Турнирдің күміс жүлдегері болып Қазалы ауданының №25 мектебі танылды. Үшінші орын Түркістан облысы Арыс қаласына қарасты Қаражантақ ауылындағы Бейсенбай Кенжебаев атындағы орта мектеп командасына бұйырды.
Жарыс қорытындысы бойынша ұйымдастырушылар үздік ойыншыларды жеке номинациялар бойынша марапаттады:
- «Үздік қақпашы» – Мейірім Оразалы (Түркістан облысы);
- «Үздік қорғаушы» – Зарина Ақбаралықызы (Жамбыл облысы);
- «Үздік жартылай қорғаушы» – Айдина Жанатбекқызы (Қызылорда облысы);
- «Үздік шабуылшы» – Адалят Мелис (Алматы облысы);
- «Үздік ойыншы» – Алина Октябрьқызы (Алматы облысы);
- «Үздік бапкер» – Өмірзақ Сәрсенов (Қызылорда облысы).
Турнирдің үздік жаттықтырушысы атанған Қызылорда облысы командасының бас бапкері Өмірзақ Сәрсенов шәкірттерінің өнеріне тоқталды.
«Біз Қожабақ ауылынан келдік. Жыл сайын ұлттық мектеп лигасының республикалық кезеңіне қатысамыз. 2024 жылы екінші орын алдық, ол кезде қуанып қайтқан едік. Өткен жылы, өкінішке қарай, жүлдегерлер қатарына ілінбедік. Биыл бірінші орынды мақсат еттік, финалға дейін жеттік, бірақ соңында тағы да екінші орын алдық. Бұл нәтижеге де ризамыз. Қыздар жақсы ойын көрсетті, мен оларды мақтан тұтамын. Алғашқы ойында Алматы облысы командасын 2:1 есебімен жеңдік, алайда финалда сәл ғана сәттілік жетіспеді. Бірақ бұл – футбол, жеңімпаз тек алаңда анықталады», — деді Сәрсенов.
Іле ауданы №20 мектеп командасының ойыншысы Бифатима Әменгелді турнирдегі әсерімен және командасының көңіл-күйімен бөлісті.
«Бұрын кәсіби футбол клубында ойнадым, кейін мансабымды аяқтадым. Алайда мұндай мектеп турнирі туралы білген кезде, сыртта қала алмадым. Алаңда қыздардың арасында ерекше өзара түсіністік болды, бір-бірімізді жақсы сезіндік. Қарсыластар мықты әрі қарқынды ойын көрсетті. Біз де жеңіске ұмтылып, „Былғары доп“ кубогы үшін бар күшімізді салдық және ақыры мақсатымызға жеттік», — деді Б.Әменгелді.
Ұлттық мектеп лигасы аясындағы жасөспірімдер арасындағы матчтар 24–30 сәуір аралығында өтеді.