Қазақстан футбол федерациясының техникалық даму комитеті 17 сәуірде өткен отырыста ұлттық құрамалардың негізгі даму бағыттарын, олардың соңғы нәтижелерін және алдағы кезеңге арналған жоспарларын қарастырды, деп хабарлайды BOOKIE.KZ ҚФФ баспасөз қызметіне сілтеме жасап.
ҚФФ техникалық директоры Геннадий Скуртул комитет мүшелеріне «Батыр жолы» жобасының («Путь Батыра») тұжырымдамасын таныстырды. Құжат заманауи талаптар мен ұлттық бірегейлікті ескере отырып, қазақстандық футболшының бірыңғай бейнесін қалыптастыруға бағытталған. Талқылаудан кейін тұжырымдама мақұлданып, айтылған ұсыныстарды ескере отырып, пысықтауға жіберілді.
Күн тәртібіндегі жеке мәселе ретінде 2026 жылғы 1–9 маусым аралығында өтетін ФИФА-ның маусымдық терезесіне арналған күнтізбе қаралды. Кесте құру кезінде ұлттық құрамаларға басымдық берілетіні расталды және матч күндерін клубтық турнирлермен үйлестіру қажеттілігі атап өтілді.
Комитет Қазақстан құрамаларының УЕФА аясындағы жарыстардағы өнерін талдады. U-17 және U-19 жасөспірімдер ерлер құрамаларының Еуропа чемпионатының элиталық іріктеу кезеңіндегі нәтижелері қанағаттанарлық деп бағаланды. Сонымен бірге, ел тарихында алғаш рет екі жасөспірімдер құрамасының қатарынан элиталық раундқа шығуы маңызды жетістік ретінде атап өтілді.
Федерация U-17 құрамасының бас бапкері Бауыржан Сағындық пен U-19 командасының жаттықтырушысы Сергей Лабодовскийдің штабтарына алғыс білдіріп, дайындықтың бастапқы кезеңіндегі Кирилл Кеккердің еңбегін жеке атап өтті.
Әйелдер құрамалары арасында Юлия Мамонова жаттықтыратын U-17 командасының нәтижесі жоғары бағаланды. Құрама В лигасының іріктеу тобында бірінші орынды иеленіп, тарихта алғаш рет А лигасында ойнау құқығына ие болды. Ксения Постова басқаратын U-19 әйелдер құрамасының көрсеткіші төмендеу деп танылды, алайда команда жас ойыншылармен өнер көрсеткені ерекше көрсетіліп, бұл халықаралық тәжірибе жинаудың маңызды кезеңі ретінде қарастырылды.
Кадрлық бөлімде бірқатар тағайындаулар бекітілді. Тимур Қасымов 2008 жылы туған ойыншылардан құралған U-19 құрамасының аға жаттықтырушысы болып тағайындалды. Бұл команда маусым айында Грекияда өтетін А лигасында Грекия, Португалия және Сербия құрамаларына қарсы ойнайды. Русланжан Раимбақиев 2010 жылы туған футболшылардан жасақталған U-17 құрамасының аға жаттықтырушысының міндетін атқарушы болып бекітілді, бұл команда қараша айында Грузияда өтетін іріктеу турниріне қатысады.
Помимо этого, Комитет 2006–2007 жылы туған футболшыларды маусымдағы ФИФА терезесінен бастап U-21 жастар құрамасына кезең-кезеңімен енгізуді қолдады. Мұндай тәсіл ұлттық командалар құрылымында сабақтастықты қамтамасыз ету және ойыншыларды жүйелі түрде дамыту стратегиясының бөлігі ретінде белгіленді.