Қазақстан футбол федерациясының техникалық орталығы қақпашылармен жұмыс істейтін мамандарға арналған UEFA «B-Goalkeeper» бапкерлік лицензиясы курсына өтінім қабылдау басталғанын хабарлады, деп жеткізеді BOOKIE.KZ Қазақстан футбол федерациясының баспасөз қызметіне сілтеме жасап.
Оқуға қатысқысы келетін үміткерлер Қазақстан футбол федерациясының ресми сайтындағы «Техникалық орталық» бөлімінде тіркеуден өтіп, онлайн-өтінім нысанын толтыруы тиіс. Өтінім бергеннен кейін кандидаттар іріктеу ережелеріне сәйкес құжаттар топтамасын ұсынуы қажет.
UEFA «B-Goalkeeper» курсына қабылдаудың негізгі талаптары
- UEFA «C» санатындағы жарамды бапкерлік лицензиясының болуы;
- «C» лицензиясын алғаннан кейін қақпашылар бапкері ретінде кемінде алты ай жұмыс тәжірибесінің болуы;
- дене шынықтыру саласында орта арнаулы немесе жоғары білімнің болуы;
- оқыту тілін — қазақ немесе орыс тілін ауызша және жазбаша еркін меңгеру;
- тіркеу үшін толық құжаттар топтамасын ұсыну;
- практикалық сабақтарға қатысуға медициналық қарсы көрсетілімдердің болмауы (медициналық анықтамамен расталады);
- оқу кезеңінде Қазақстан Республикасының аумағындағы тиісті деңгейдегі футбол құрылымында тұрақты бапкерлік тәжірибеден өту мүмкіндігінің болуы.
Тіркеу үшін кандидаттар ойыншы және бапкерлік мансабы көрсетілген түйіндеме, жеке куәлік немесе паспорт көшірмесін, сондай-ақ наркологиялық және психоневрологиялық диспансерлерден анықтамалар мен соттылығының жоқтығы туралы құжат тапсыруы тиіс. Бұл мәліметтер үміткерді бағдарламаға қатысуға жіберу үшін қажет.